ခွန်းဘီထူး​

    ခွန်းဘီထူးသည် IEC ကို စတင်ဖွဲ့စည်းစဉ်တည်းက ဒုတိယဥက္ကဋ္ဌအနေဖြင့် ပါဝင်ခဲ့သူဖြစ်သည်။ သူသည် တန်းတူညီမျှရေး၊ လူ့အခွင့်အရေးနှင့် ဒီမိုကရေစီရေးရာကိစ္စရပ်များအတွက် အချိန်ကာလ ကြာရှည်စွာ တိုက်ပွဲဝင်ခဲ့သူတစ်ဦးဖြစ်ပြီး စစ်တပ်မှ ရေးဆွဲသော ၂၀၀၈ ဖွဲ့စည်းပုံအခြေခံဥပဒေကို ပြည်လုံးကျွတ်ဆန္ဒခံယူသည့် အစီအစဉ်အား ဆန့်ကျင်တော်လှန်ရန် စည်းရုံးလှုံဆော်ခဲ့ခြင်းကြောင့် ၂၀၀၈ ခုနှစ်မှ ၂၀၁၂ ခုနှစ်အထိ ဖမ်းဆီးအကျဉ်းချခံခဲ့ရသူလည်း ဖြစ်သည်။ ထောင်မှ လွတ်မြောက်လာပြီးသည့်နောက်တွင် သူ​၏ လူ့အခွင့်အရေး၊ တရားမျှတမှုနှင့် ကိုယ်ပိုင်အုပ်ချုပ်ခွင့်အတွက် တိုက်ပွဲဝင်မှုများသည် ပို၍ အရှိန်အဟုန် ပြင်းထန်လာခဲ့သည်။ ကရင်နီ​၏ နိုင်ငံရေးဆိုင်ရာ ကိစ္စရပ်များတွင် ပါဝင်ခဲ့ပြီး ကယန်းအမျိုးသားပါတီ​၏ ဥက္ကဋ္ဌအဖြစ် ခန့်အပ်ခြင်း ခံခဲ့ရသကဲ့သို့ ၂၀၂၀ ခုနှစ်တွင် ကျင်းပသော အထွေထွေရွေးကောက်ပွဲတွင်လည်း ပါဝင်ယှဉ်ပြိုင်ခဲ့သည်။ ၂၀၂၁ ခုနှစ် နွေဦးတော်လှန်ရေးအစ၌ပင် သူ​၏ ဦးဆောင်မှုဖြင့် ကရင်နီပြည်အတွင်း အင်အားအကြီးဆုံးခုခံတော်လှန်ရေးအင်အားစုတစ်ခုဖြစ်သော ကရင်နီအမျိုးသားများကာကွယ်ရေးတပ် (KNDF) ကို ဖွဲ့စည်းခဲ့ပြီး ထိုအချိန်မှစတင်ကာ စစ်သေနာပတိချုပ်အဖြစ်လည်း တာဝန်ယူထားခဲ့သည်။ သက်လတ်ပိုင်းအရွယ် တက်ကြွသော ဒုတိယဥက္ကဋ္ဌတစ်ဦးအနေဖြင့် ခွန်းဘီထူးသည် ကရင်နီပြည်တည်ဆောက်ရေးလုပ်ငန်းစဉ်များတွင် အားသွန်ခွန်စိုက်ပါဝင်ဆောင်ရွက်လျက်ရှိသည်။